Në nëntor prezantohet Samsung A5

Samsung po punon për krijimin e tri pajisjeve të reja që do të bëjnë pjesë në serinë A të telefonave inteligjentë. Këta do t’i bashkohen telefonit Galaxy Alpha, si pjesë e telefonave të rinj inteligjentë të Samsung-ut që kanë trup prej metali. Këtë veçori kanë kohë që po e kërkojnë fansat e Samsung-ut. 

Kur mund të prezantohen telefonat inteligjentë SamsungA5, A3 dhe A7? SamMobile raporton se Samsung A5 pritet të prezantohet në Kinë këtë nëntor, dhe mund të kushtojë rreth 400 dollarë deri në 450 dollarë. Thuhet gjithashtu se do të ketë disa ndryshime të vogla tek karakteristikat e telefonit A5. Më përpara flitej se Samsung A5 mund të përmbajë ekran HD, por burimet e SamMobile raportojnë se do të ketë ekran Full HD. 

Mendohet se Galaxy A5 do të ketë një ekran 4.8 inç Full HD, procesorin Snapdragon 410 me shpejtësi 1.2 GHz, 2GB RAM, 16 GB hapësirë, kartën grafike Adreno 306 GPU, kamera të pasme 13 megapikselë dhe kamera ballore 5 megapikselë. 

Ky telefon inteligjent do të operojë me sistemin operativ Android 4.4.4 KitKat, dhe do të fuqizohet nga bateri me kapacitet 2300mAh. Nuk e dimë nëse kjo pajisje do të jetë në dispozicion vetëm në Kinë apo do të dalë edhe në tregje te tjera.